Aaj toh roadie main bankar dikhaunga,
Yeh khayal lekar har koi jaata hai,
Roadie toh adventure aur achche kaam karke koi bhi ban jaye,
Par gaali khane ka mazaa toh bas MTV pe hi aata hai…
Toh ji aaj,
Tadke tadke Chintu hamara Gurgaon waala,
ghar se munh haath dhokar nikla tha,
Bahut bojh tha bechare ke kandhon par,
aakhir apne maa baap ka woh ikla tha…
Bachpan se kehta tha,
bada hokar maa baap ka naam roshan karunga,
Amity se engineering ya IIPM se MBA na kar paya toh kya hua,
Ek din apne khaandaan ka pehla Roadie toh zaroor banunga…
Dil mein umang thi, saanso mein nayi tarang thi
motorcycle uski 100 paar kar gayi thi,
na jaane kitne traffic signal ki laal battiyon ko
taad gayi thi…
Audition ground mein pahunchne par,
lambi line dekh uska dimaag sanka tha,
tabhi ek idea uske sir mein khanka tha…
Socha ki kyun na thodi maar pitayi kari jaaye,
metallica ke audition mein jo rehersal kari thi,
aaj yahan istemaal kar aadhi se jyaada janta
darr ke maare durr kari jaaye…
Idea jo uska safal hua tha,
muskaan fir nayi aayi thi,
uske roadie ban ne ke sapne mein,
jaan fir ek nayi laayi thi…
GD toh gaaliyon ke dum par paar kiya tha,
Kuch galat thode hi hai,
Roadies ke audition mein,
roadies ki rashtriya bhasha ka hi toh istemaal kiya tha…
Ab baari thi Raghu Rajeev se bhidne ki,
ek naye prakaar ka maha yudh chidne ki,
doston se gaali kha kha kar ladka bilkul sayana ho gaya tha,
gaaliyon ke dum par contestant ko darane ka bahaana,
uske liye puraana ho gaya tha…
Mountain dew pee darr jo usne bhagaya tha,
bani ke ajeeb sawaalon se chutkara pa kar,
PI room mein ghusne ka mauka paaya tha…
“Roadie banega ********”
iss tarah jo uska swaagat hua
aisa laga jaise bachpan ka uska sapna
raghu ke munh se gaali kha kar pura hua…
Gin gin kar usne apni saari kartootein batani shuru kari
Kab kaunsi ladki patayi thi,
kab kiski kothi khali karwayi thi,
kab kahan kisse peeta tha,
kis kis ki baahon mein kaunsa mahina beeta tha…
Adventure ke naam pe toh maa baap ke khoob paise udaye the,
par dusron ke paison par ghumne firne hi toh
roadie mein apne chintu nawaab sahab aaye the…
Khair,
Pata chala tha ki iss saal unka selection nahin hua,
Dil jaise toot sa gaya tha…
Par koi gum nahin,
abhi aur season aayenge,
kabhi na kabhi toh hamare chintu ji bhi ek roadie zaroor ban jayenge….
Ye hain aaj ke majnu,
Ghoomte hain apni laila ki talaash mein,
Kisam kisam ke tareeke hain inke,
Har samay ladki patane ke 101 tareeke
Ghumte hain dimaag mein jinke
Laundiabaazi ka ek chapter aaj ye aapko padhyenge,
Dekhiye apni bewakoofi se aapko ye kya kuch sikhayenge
- - - - -
Railgaadi ka shauchalya,
Shauchalya ki deewarein,
Deewaron pe aashiqon ke number,
Jaise inhi deewaron ke dwaara unhe shaadi ke rishte aayenge
Purushon ka shauchalya,
Shauchalya ki deewarein,
Deewaron par fir aashiqon ka number,
Jaise inhi deewaron ke zariye baap apni betiyon ke liye khushiyon ki saugaat layenge
College ka canteen
Ladko waali table
Table par bajte tablee
Jaise aaj toh pucca kisi ladki ko himesh reshamiya ke gaano se patayenge
Mohalle ki chhat,
Chhat par launde,
Laundon ke gale mein duurbeen,
Usse taakte saamne waali building ki ladkiyan,
Jaise window shopping ke zariye hi dukaan luut kar le jayenge
Class ki benches,
Benches par kurede hue kuch naam,
Naam ke Charon taraf bana ek dil,
Jaise apni table par naam likh, uske dil par yehi chha jayenge
Cinema hall ka andhera,
Saamne chalte kuch scene,
Aage ki row mein hain ladkiyan,
Aur harr scene mein bajti hain seetiyan,
Jaise aaj sitiyon ke bal par yahin se apni hone waali biwiyan chun kar jayenge
Rikshe mein baith,
Tuition padhne jaati ladki,
Ladki ka latakta hua dupatta,
“Madam zara sambhal ke, pallu sang hamara dil bhi sarak jayega”
Jaise altaaf raja ki shayari se hi ladkiyon ka dil loot ye le jayenge
Orkut ke scrap,
Scrap mein ek sandesha,
Sandesh mein mohabbat ka izhaar,
Jaise ladki ki photo ke peeche baithe ladke, apni behno ka haath unhi ke haath mein de jayenge
“Toh soch samajh kar ishq farmayie,
kyunki janab mohabbat ek aisa sholon ka dariya hai,
jahan duub kar jaana hai paar,
Yahan toh bas aashiqui ki aag mein jalna hai,
nahin chalta yahan bewakoofi ka vyapaar”
Kuch Samjhe?
